條鱔好肥美。 切件後成隻魚碟都鋪滿。 但係覺得唔夠食。 因為太好味喇~
材料 :
白鱔
陳皮
蒜蓉
芫荽
豆豉
葱
蒜蓉豆豉調味 :
生抽、糖、少許麻油
白鱔調味 :
生抽、糖、鹽、紹酒、已調味蒜頭豆豉、油後下
做法 :
1)果皮沖淨後用熱水浸軟。 去囊後切絲備用。
2)葱切段再切絲備用。
3)豆豉洗淨後加入蒜蓉"盅"爛後加入"蒜蓉豆豉調味"拌勻備用。
4)把白鱔去潺洗淨用廚紙吸乾水份後切件, 厚度約 1.5cm 。 放在鐵盆內加入白鱔調味再拌入 3) 加少許油撈勻後排在魚碟上。 將果皮絲灑上。 加入 2 湯匙水。 加蓋以中火加熱至冒煙轉細火蒸 10 分鐘 (時間視乎厚度和份量)。
5)蒸魚期間燒滾一湯勺油。
6)白鱔蒸好後,灑上葱絲和芫荽後灒下熟油即可。
如何將白鱔去潺貼士 :
1)可請魚檔代勞。 會幫你去潺,返屋企只要洗吓佢然後切件就得了。
2)先戴上防滑手套,用約 80 度的熱水將鱔汆水 1 分鐘,取出後用小刀刮外皮便可以輕易刮走白色的潺。 然後用水沖淨,便可切件。
嘩..原來你係廚神,我要多多來請教你先得
回覆刪除廚神就冇喇。 地獄廚房就有一個。 我鐘意煮, 所以成日學吓呢度啲高手點煮咋。#^_^#
刪除